mubo ug gamay

mubo ug gamay

12/26/2017

ang kinabuhi mubo ug gamay,

sama unta niini ang atong kalipay;

dili na kinahanglan ang nanghingapin nga katigayunan,

aron adunay igo nga bahin ang uban.

ang tinunay nga kalipay yano,

wa magsalig sa mansyon o palasyo;

ang pagpanag-iya sa halapad nga kayuta-an,

mosangpot lang sa paghikaw sa uban.

ang pagkanihit ug pagpasulabi,

sukhwahi sa mubo ug gamay nga kinabuhi;

ang bahandi nga hilabihan,

tinubdan sa way kaangayan.

ang nanghingapin usa ka pag-usik usik,

sa mga butang nga angay ipa-ambit;

ang naglabi nga katimawa ug kaadunahan,

maoy hinungdan sa gubot nga katilingban.

gamay nga balay,

sarang lang sa banay;

sibo lang ang mga lawak,

alang magti-ayon ug mga anak.

gamay nga kusina,

sigo lang sa mga kubyertos sama plato, baso, tinidor, ug kutsara;

gamay nga hapag-kan-anan,

ug sakto nga lingkuranan.

gamay nga kasilyas ug banyo,

igo lang sa pagkaligo ug pagpanglimpyo;

gamay nga sala,

alang sa banay ug mga bisita.

ang kinabuhi ug kalipay,

hingpit lang nga mubo ug gamay:

mubo apan dili kitid,

gamay apan dili pi-it;

subay sa kaangayan,

di kapin di kulang.