maria

maria

12/26/2017

didto sa internetan,

nagkatakdo ang atong dalan;

matahum nga nilalang,

unsa ang imong pangalan?

ang kulba ug hinam,

nagbugno ning dughan;

ang baba kong tabi-an,

hilom pa sa nag-awop nga bulan.

sa imong paglingkod

dapit sa akong kilid,

ang akong kalibutan niluhod,

nihunong pagligid.

mikaging ang akong panimuot,

pagbati sa dughan mihuot;

nisaliray ang akong mga mata,

didto sa imong imong computer screen napunta;

ug sa wa ko damha didto nalatid ang imong e-mail,

samtang dali kining napatik sa panumduman kong daw papel.

kalipay ko ba bisan wala ko tagda,

ang akong mga pasiklap wala gyud mogana;

wa igsapayan kay ang yawi nasud na sa akong bulsa,

ang e-mail address sa ma-anyag nga maria.

mao kini ang sinugdanan sa taas nga sugilanon,

mahitungod sa gugma nga maaghop ug malig-on;

bunga niini si Kane ug si Kafka,

polos gwapo ug gwapa;

ang mga tawo nangutana asa liwat sila,

nahibung ko sa ilang katingala;

di ba diay tataw sa akong histrusa?

ang puno-an baya maoy tinubdan sa bunga.

pweh!