Basin sa Balak

-

Basin sa Balak



8/10/17
basin sa balak makat-on ang dughan
sa pag asoy sa dili matukib
diin mapandol ang hunahuna
motadlas ang handurawan
sa kamatuoran nga walay utlanan.
basin ang tanlag makaangkon sa kagawasan
subay nianang tudling nga way pinalabi  -tul-id man o baliko.
basin sa pagtagik sa mga garay ug huni,
makab-ut ang way kinotubang luna  -patag,  libaong,  balikid,  walog-
alang sa mga batid ug yano,
nga andam maminaw,  mosabot, ug mobati sa way pagpanghusga.
basin sa pamalak masinati ang kalinaw ug kahilom.

Comments

Post a Comment

Popular posts from this blog

DESIDERATA (Cebuano Version)

-
DESIDERATA (Cebuano Version) L akaw nga malinawon taliwala sa kasaba ug pagdali, ug hinomdumi ang kalinaw nga masinati diha sa kahilom. K utob sa mahimo, sa walay paglunga, pakigdait sa tanang mga tawo. Ipamulong sa tataw ug hinay ang imu’ng kamatuuran; ug paminawa ang uban, bisan ang mga walay kahibalo ug kabaangkaagan; sila man adunay kaugalingong sugilanon. Likayi ang mga tawong banhaan ug magubtanon; makasamok sila sa galamhan. K un imong itandi ang kaugalingon sa uban, basin magmapahitas-on ka u dili ba kaha maaligotgot, kay sa kanunay adunay mga tawo nga labaw o ubos pa kanimo. Pagmalipayon sa imong mga kalampusan ingon man sa imong mga laraw. Padayon nga madasigon sa imong mga tahas, apan pabiling mapainobsanon; kini maoy tinood nga bahandi sa nag-usab-usab nga kapalaran sa panahon. M agma-inampingon sa imong mga patigayon, kay ang kalibutan napuno sa pagpanlimbung. Apan ayaw pagpakabuta sa mga hiyas; Daghang mga tawo nanlimbasog sa pagkab-ot sa hataas nga mga mithi, ...
Read more

Baybayon

-
Baybayon 5/1/11 Ang baybayon saysay sa kinabuhi sa tawo. Sa pagdagsa sa mga balod, Natukib ang mga tanghaga Nga naglimin sa alimbuyok sa sulog. Hulagway sa atong pakigbisog, Ang pagta-ob ug paghunas sa dagat. Bisan ang kapalaran sa mga gapnod, Nag-asoy man sa atong damgo ug paglaum. Ang malig-it nga mga bato, Ug lunsay putli nga mga balas, Salamin sa kaligdung ug hiyas.
Read more