Balaksip (Balak Nga Tinagsip)

uyab sa pilosopiya ang mga pilosopo nabaniog niini ang mga karaang Griego labina si Aristotle ug Plato ang pilo nangahulogan ug gugma kalaaman usab ang sopiya  sa Sugbuanong Binisaya ang pilosopiya gugmalam buot ipasabot paghigugma sa kaalam pagkatingala, pagtuki, ug pagpangutana ang hinagiban sa pilosopiya kini usa ka disiplina nga walay utlanan kay ang tanan mahimong pamalandongan 

kun ang atong damgo lapad  hamugaway ang atong panimpad hawan ang atong panabot nihit ang kagubot husay unta ang atong dakbayan lapad ang atong kadalanan lu-ag ang atong salidlid walay binuang sa kilidkilid ang tanan adunay luna ug kabutangan awto, tawo, karomata, kabayo, ug edipisyo ang pusod sa Sugbo dili unta hagip-ot dali ra makit-an ang mangunguot magpanagana ang manglabhinay ang mamaligya ug mamalitay dili magsikhanay kung lapad pa ang atong panabot motamod ta sa mga balaod taas ang atong pailob walay abusado, walay hawod  hapsay unta ang haywi ang trapik luag sige  nihit ang disgrasya walay rodreyds ug patay dili pa kas sa krudo ug gasolina

ang saad angay tumanon. ang tala angay buntogon. katumanan ang kinabuhi sa panaad Pagkabuntog ang kapalaran sa tala. busa, ang tumana ang imong panaad ug gub-a ang natala.

balaksip ug haiku 11/26/17 kun ang mga hapon adunay haiku, ang mga cebuano adunay balaksip- "balak nga tinagsip." ang tinagsip dili gamay dili pud daku, dili taas dili pud mubo, dili lisod dili pud sayon, hinoon lunsay ug yano. ang tinagsip bayani sa mga tipik, -tipik nga panlantaw ug panahom- tipik lamang di kinabuk-an, kay ang absolute makadaut. ang balaksip usa ka matang sa pakighimamat sa kamatuoran,  kaayo,  katahum,  ug kaalam. ang iyang lak-ab ug garay walay bugtong sukdanan; mahimong magsungay ug mag-angay, ang kinahanglan  adunay katahom ug saysay. ang balaksip susama sa timo, dili bus-ok dili pud gaan; igo lang masudlan ang tiyan. diha sa tinagsip maugmad ang kabuhong, sa hinay-hinay apan bug-os ug kanunay, ang kalamboan maangkon, sama sa kamakanunayon sa mga hapon . balagsip sa mutya sa sidlakan, haiku sa yuta sa adlaw nga nagsubang.

Basin sa Balak 8/10/17 basin sa balak makat-on ang dughan sa pag asoy sa dili matukib diin mapandol ang hunahuna motadlas ang handurawan sa kamatuoran nga walay utlanan. basin ang tanlag makaangkon sa kagawasan subay nianang tudling nga way pinalabi  -tul-id man o baliko. basin sa pagtagik sa mga garay ug huni, makab-ut ang way kinotubang luna  -patag,  libaong,  balikid,  walog- alang sa mga batid ug yano, nga andam maminaw,  mosabot, ug mobati sa way pagpanghusga. basin sa pamalak masinati ang kalinaw ug kahilom.

Baybayon 5/1/11 Ang baybayon saysay sa kinabuhi sa tawo. Sa pagdagsa sa mga balod, Natukib ang mga tanghaga Nga naglimin sa alimbuyok sa sulog. Hulagway sa atong pakigbisog, Ang pagta-ob ug paghunas sa dagat. Bisan ang kapalaran sa mga gapnod, Nag-asoy man sa atong damgo ug paglaum. Ang malig-it nga mga bato, Ug lunsay putli nga mga balas, Salamin sa kaligdung ug hiyas.

Kinabuhing Sinukgay 4/21/11 sama sa kan-on nga di maluto kun di sukgayon ang kinabuhi uyogon usab sa alimbuyok sa sulog ang mapaubos sagad mahimong dukot ang mapataas unang matukob ang tunga-tunga sagad mapan-os

Dagway sa Hinigugma 4/18/11 ang imong mga ngabil gihay sa rosas, dagtom pula nga aswetis. ang imong mga mata hudyaka sa talikala, subang sa takdol. ang imong mga aping hinog nga mansanas, pulagaw nga kasadpan. ang imong kandi-is alimpulos sa kabukiran, buhawi sa kalawran, lilo sa Santander. ang imong dughan bukid sa Sion, bungtod sa kabulahanan.

Biyernes Santo Tam-is ba kadtong kauhaw, Nga di mapanton sa aslom nga suka? Unsa kabililhon ang tawhanong kinabuhi, Nga halaran man sa Diosnong kamatayon?

Pasko 12/24/10 Dili ni ako, dili pud imo. Ang pasko, Iya ni Kristo.

Ang Tabanog Ni Nilo 11/28/10 Ang tabanog ni Nilo, Nindot kaayo, Sa kahanginan mosulbong ug motidlum, Mokiay-kiay ug mosaliray. Maayo pa si Nilo, Nahimo nang piloto.

Ang Imong Talidhay 8/2/10 Ang imong talidhay ungol sa uwagang iring inagulo sa pisot nga iro tiyabaw sa gipulang nga kanding tilaok sa binabayeng manok daghong sa gihayblad nga butakal tinga sa giurom nga lamok agik-ik sa karaang pultahan utot sa engkantong bayot.

Auto de Luho Auto de luho Sakyanan kuno sa mga engkanto Matud pa ni Ombo Managit ug bata kun di matulog inig ka udto.

Kandiis Lilo, alimbuyok, bung-aw nga misuyop sa nalipong kong panimu-ot; Naratol, wa na katoltol, gimino sa maanyag nga buho. Panan-aw, Kalimutaw, Milarok daw udtong tutok; Nalibat, Nalit-ag, Nasa-ag sa bangag, Nga midayandayan, Sa matahum mong pahiyom.

gone mossed is the vow that we carved on the rock’s sturdy cheeks withered too are the maguey leaves on which written the blessed day, month, and year above our names the promise once made and the wish for the morrow are gone with the wind.

Asa Na? gilumutan na ang panumpa nga atong gikulit sa lapad nga aping sa panas nalaya na usab ag mga dahon sa magay diin nalatid ang hamiling adlaw, bulan, ug tuig ibabaw sa atong pangalan ang panaad nga gibilin ug pangandoy sa kaugmaon nahanaw uban sa hangin.

Haw-ang Haw-ang ang lawak sukad sa imong pagbiya. Ang lantay kawayan nga naghigda daplin sa pultahan Gisugdan na ug tukob sa mga bokbok. Ang mga tunob sa sayop nga lakang Nagpabiling buhi ilawom sa mga abog nga milimin sa salog. Ang amakan nga bintana nagsigi lang ug pasiklap Ang siklat nga pultahan nagsigi lang ug panglili. Tingali nagpaabot sa imong pagbalik.

Kalipay plas Kasakit ikwals Himaya. Pag-antus tayms Paningkamot ikwals Kalampusan. Gugma dibaydidbay Asawa, Bana, ug Anak ikwals Pamilya. Kinabuhi maynus Ginoo ikwals Empiyerno.